01.02.2024   E dashur mërgatë gostivarase, kryesi dhe lojtarë të 16-të shoqatave që morët pjesë në Turne, të nderuar sponsorë, motra dhe vëllezër, Për gjithë Ne, mërgatën nga Gostivari që e përjetuam dhe realizuam turneun në futboll të vogël me shoqatat e Gostivarit në Mërgim, 27 janari i 2024-ës, në kujtesën tonë do të jetë si ditë Unifikimi, një ngajrje dhe ditë e madhe, e pa përjetuar deri më tani. Falë dëshirës, nismës dhe vendosmërisë tuaj dhe tonë, bashkërisht i dhamë jetë ËNDRRËS dhe IDESË sonë, jetësimit të Kupës së Gostivarit në Mërgim. Neve si nismëtarë, prania juaj na nderoi, pjesëmarrja juaj i dha vlerë turneut, Ju e hijeshuat dhe zbukuruat këtë ditë. Ne vendosmë që këto rreshta, këto fjalë të ju prekin dhe të vijnë të gjithë ju që ishit atë ditë në Turne, gjithë juve dhe neve që udhëtuat dhe udhëtuam nga qindra e mijëra kilometra nga gjitha anët e Zvicrës, nga Italia, Austria dhe Gjermania, e Gostivari për të qenë në Weinfelden, bashkë dhe një, si Gostivaras,  në ngjarjen e parë të përbashkët. Me angazhim të përbashkët, ia dolëm që Gostivarin ta bëjmë krenar. Dëshmuam se mund të bashkëveprojmë, ishim të përkushtuar dhe kishim gatishmëri për t’i shërbyer të mirës. Askush nuk u dallua, të gjithë ishim NJË dhe të njëjtë. Fitues ishim të gjithë, sepse turneu nisi e mbaroi në mënyrën më të mirë, qetë, konkurrues dhe fitues, me një sallë të mbushur gjatë tërë ditës. Turneu ka mundur të jetë edhe shumë më mirë i organizuar, por kësaj radhe këto ishin mundësitë tona. Për gabimet dhe lëshimet pa dashje, të gjithëve u kërkojmë ndjesë dhe mirëkuptim. Fjalët dhe përshtypjet tuaja dhe tonat janë që ky Turne, të bëhet i për vjetshëm, tradicional. Me angazhim dhe gjithëpërfshirje, do ta bëjmë edhe më mirë, edhe më bukur. FALEMINDERIT çdonjërit, i madh e i vogël, pleq e të rinj, të rinj e të reja, gostivaras e gostivarase, që e hapët derën e bashkëpunimit, që informuat, promovuat dhe shpërndatë çdo gjë për dhe rreth turneut. Zoti e bekoftë Gostivarin, Zoti u bekoftë Gostivaras! Me respekt, grupi organizativ i turneut, pjesë e nismës për themelimin e Shoqatës së Mërgimtarëve Shqiptarë nga Gostivari Weinfelden, me 27 Janar 2024